ມາຮອດມື້ນີ້ ທາງທະນາຄານ ແຫ່ງສປປລາວ ກໍຍັງບໍ່ທັນ ອະທິບາຍ ໃຫ້ສັງຄົມຊາບເທື່ອ ເຖິງເຫດຜົນໃນການເລືອກເອົາ ຮູບຄົນແທ້ ໃສ່, ນາງສາວ ທັງ 3 ເປັນໃຜ ແລະ ມີຄວາມສໍາຄັນ ແນວໃດ ຕໍ່ສັງຄົມ.
ແຕ່ເຖິງແນວໃດ ທ່ານ ສຸພັດ ໂຄດໂຍທາ ຫົວໜ້າກົມ ເງິນຕຣາ ທະນາຄານແຫ່ງສປປລາວ ກໍໄດ້ກ່າວ ໂດຍທີ່ ພວກທ່ານ ຍອມຮັບວ່າ ເປັນຮູບຖ່າຍຂອງຄົນແທ້ ແລະ ກໍເປັນ ພະນັກງານ ໃນທະນາຄານແຫ່ງສປປລາວແຕ່ຮູບນັ້ນ ໄດ້ຜ່ານ ການເອົາໄປແຕ້ມ ຄືນອີກເທື່ອນຶ່ງ ຢູ່ປະເທດ ຣັດເຊັຽ.
ທ່ານສຸພັດ ກ່າວອີກວ່າ ຕົນບໍ່ຄິດ ເລີຍວ່າ ຈະມີຫາງສຽງ ວິຈານ ຈາກສັງຄົມ ຫລາຍປານນີ້ ເພາະຄິດວ່າ ທາງທະນາຄານ ໄດ້ເຮັດອອກມາ ດີທີ່ສຸດແລ້ວ.ບັນຫານີ້ ບໍ່ພຽງແຕ່ ໄດ້ນໍາ ໄປຖົກຖຽງກັນ ຢູ່ຕາມພື້ນຖານ ສັງຄົມ-ຊຸມຊົນຕ່າງໆ ແຕ່ຫາກຍັງ ໄປເຖິງຣະດັບ ຣັຖບານ ແລະ ສະພາ ແຫ່ງຊາດ ແລ້ວ.
ການປ່ອຍ ເງິນກີບໃໝ່ ໃບພັນ ຈະຖືກງົດໄປ ຈົນກວ່າ ຈະໄດ້ຮັບການພິຈາຣະນາ ມີຂໍ້ຕົກລົງຈາກຣັຖບານ ອີກເທື່ອນຶ່ງ ເສັຽກ່ອນ. ສ່ວນທີ່ຖືກນໍາອອກໃຊ້ແລ້ວ ກໍສາມາດ ໃຊ້ຈັບຈ່າຍໄດ້ ຕາມປົກກະຕິ.
ເມື່ອວັນທີ 30 ຕຸລາ 2008 ນີ້ ທະນາຄານ ແຫ່ງສປປລາວ ໄດ້ອອກແຈ້ງການ ນໍາເອົາທະນະບັດ-ໃບພັນກີບ ທີ່ໄດ້ຮັບການປັບປຸງ ແລະ ພິມໃໝ່ ໃນປີ 2008ອອກສູ່ສັງຄົມ ເລີ່ມ ແຕ່ເດືອນພຶສຈິກາ ເປັນຕົ້ນໄປ ເພື່ອປັບປຸງ ຄຸນນະພາບ ຂອງໃບເງິນ ໃນການຈໍຣະຈອນ, ສົ່ງເສີມ ການນໍາໃຊ້ເງິນກີບໃຫ້ນັບມື້ກວ້າງຂວາງ, ໃຫ້ການຊໍາຣະ ຣາຄາສີນຄ້າ ແລະ ຄ່າບໍຣິການ ມີຄວາມສະດວກ ຍີ່ງຂຶ້ນ.
