http://www.vientianemai.net/news.php?TopicID=1&NewsID=6248
ຕາມການລາຍງານຈາກທ່ານ ສຸກສະຫວັນ ບົວພາ ຫົວໜ້າພາສີດ່ານສາກົນສະໜາມບິນວັດໄຕ ໃຫ້ຮູ້ເມື່ອວັນ ທີ 12 ມັງກອນ 2009 ນີ້ວ່າ: ໃນເວລາປະມານ 14 ໂມງຂອງວັນທີ 16 ທັນວາ 2008 ຜ່ານມານີ້ ທາງເຈົ້າໜ້າທີ່ພາສີ ແລະ ພະນັກງານພາກສ່ວນ X-ray ປະຈຳຈຸດກວດກາຕຶກຜູ້ໂດຍສານຂາອອກ ຊັ້ນ II ດ່ານສາກົນສະໜາມບິນວັດໄຕ ໄດ້ ກວດກະເປົາຕິດຕົວຜູ້ໂດຍສານທີ່ໜ້າສົງໃສ 2 ຄົນ ທີ່ຈະເດີນທາງໄປບາງກອກ ປະເທດໄທ ໃນຖ້ຽວບິນ TG- 692 ໄດ້ພົບ ເຫັນເງິນຈຳນວນໜຶ່ງຢູ່ໃນກະເປົາຂອງຜູ້ກ່ຽວ ຊຶ່ງຜ່ານການກວດກາເບື້ອງຕົ້ນພົບ ເຫັນເງິນຕາປອມ ເປັນເງິນຕະກຸນ ຢູໂຣ ແລະ ເງິນໂດລາສະຫະລັດ ເມື່ອເຈົ້າໜ້າທີ່ກວດກາລະອຽດ ພ້ອມທັງໄດ້ປະສານໄປຍັງເຈົ້າໜ້າທີ່ຕຳຫຼວດປະຈຳ ດ່ານ ແລະ ພາກສ່ວນທະນາຄານ ແຫ່ງ ສປປ ລາວ ເພື່ອກວດສອບຢ່າງລະອຽດ ຈຶ່ງຊາບວ່າ ເປັນເງິນປອມປະເພດຢູໂຣ ຈຳນວນ 395.000 ຢູໂຣ ແລະ ແມ່ພິມເງິນໂດລາສະຫະລັດ ຈຳນວນ 2.300 ໂດລາ ພ້ອມຍັງມີບັດເຄດຼິດ ແລະ ປຶ້ມຝາກ ເງິນອີກຈຳນວນໜຶ່ງ ຊຶ່ງຜູ້ຕ້ອງຫາທັງສອງຄົນ ຊື່ : MR.YIM SOUNG HO ອາຍຸ 44 ປີ ຖືໜັງສືຜ່ານແດນເລກທີ JR 3080397 ແລະ MR.KIM JIN SOOL ອາຍຸ 50 ປີ ຖືໜັງສືຜ່ານແດນ ເລກທີ GB 0531246 ຊຶ່ງທັງສອງມີອາຊີບ ຄ້າຂາຍ ແລະ ເປັນຄົນຖືສັນຊາດ ສເກົາຫຼີ ປັດຈຸບັນຜູ້ຕ້ອງຫາທັງສອງ ແລະ ຂອງກາງທັງໝົດຖືກນຳສົ່ງໃຫ້ເຈົ້າໜ້າທີ່ ຕຳຫຼວດກະຊວງປ້ອງກັນຄວາມສະຫງົບ ສປປ ລາວ ເພື່ອດຳເນີນຄະດີຕາມລະບຽບກົດໝາຍບ້ານເມືອງຕໍ່ໄປ.
