LSAJ

               ເພື່ອນຜູ້ອ່ານຈາກບ້ານວຽງຈະເລີນ ນະຄອນຫຼວງເຮົານີ້ເອງ! ສົ່ງຂ່າວແບບເປັນຫ່ວງເປັນໄຍເຖິງການນຸ່ງຖື
ເຂົ້າມາຄໍລຳພວກເຮົາ ໃນວັນສຸກ ທີ 17/10/2008 ນີ້ວ່າ:
               ເວລາເບິ່ງຄົນໄປພິທີທາງການ ຈະເຫັນວ່າ ການນຸ່ງຖືຈົບງາມ ສຸພາບຮຽບຮ້ອຍ... ໜ້ານັບຖື... ເຫຼື້ອມໃສ?
ແຕ່ວ່າເວລາໄປບຸນສິນກິນທານ ບາງເທື່ອກໍຢູ່ວັດ ພັດແຕ່ງຕົວບໍ່ເໝາະສົມກັບຮີດຄອງປະເພນີ ເຊັ່ນວ່າ: ຜູ້ຍິງນຸ່ງສົ້ງຂາ
ສັ້ນ ນຸ່ງເສື້ອເກາະເອິກ ເປີດຫຼັງ ສາຍດ່ຽວ ທັງແມ່ທັງລູກກໍມີ ໂດຍສະເພາະບຸນອອກພັນສາຜ່ານມາກໍເຫັນ ວ່າຊັ້ນ! ສ່ວນ
ວ່າໄປກິນດອງ ໄປບຸນເຮືອນ ສູ່ຂວັນນັ້ນ ກໍແຮ່ງຫຼາຍ... ຫວ່າງມໍ່ໆນີ້ໃນພິທີໃດໜຶ່ງຂອງບໍລິສັດຫ້າງຮ້ານ ກໍນິຍົມນຸ່ງແບບ
ທີ່ວ່າໄປຢ່າງຫຼວງຫຼາຍ ສ່ວນວ່າກະໂປ່ງເຂີນ ກະໂປ່ງບາງນັ້ນ ກໍເລີ່ມກັນແລ້ວ! ...
               ໃນຖານະຜູ້ຮັບຜິດຊອບຄໍລຳ "ແນວລາວ" ກໍຟັງຫຼາຍຄົນຫຼາຍວ່າກ່ຽວກັບການນຸ່ງຖືສະໄໝນີ້ ບໍ່ອາດມີຄຳເຫັນ
ນໍ? ພຽງແຕ່ຢາກເວົ້າວ່າ ນຸ່ງແນວໃດຈຶ່ງເໝາະສົມ ແລະ ສຸພາບຮຽບຮ້ອຍ ກໍຖືວ່າໃຊ້ໄດ້ ທີ່ຜ່ານມາກໍເຄີຍໄດ້ຍິນຫຼາຍຄົນ
ສົນທະນາກັນວ່າ ໄປວັດໄປວາຄວນນຸ່ງຖືໃຫ້ຖືກ ແລະ ເໝາະສົມກັບຮີດຄອງປະເພນີລາວ ເຊັ່ນວ່າ ຜູ້ຍິງກໍຕ້ອງນຸ່ງສີ້ນ
ນຸ່ງເສື້ອມິດຊິດ... ເກົ້າຜົມ ບ່ຽງແພ ເປັນຕົ້ນ... ສ່ວນວ່າໃນເວທີອື່ນໆນັ້ນ ກໍແລ້ວແຕ່ຄວາມເໝາະສົມນໍ? ບັນຫາການນຸ່ງ
ຖືນີ້ເວົ້າອີກຢ່າງໜຶ່ງມັນກໍແມ່ນສິດທິສ່ວນບຸກຄົນ ເວົ້າກັນຍາກ... ເວົ້າແຕະຕ້ອງສິດທິ... ມັນຕ້ອງຂຶ້ນກັບຂໍ້ວິນິໄສຂອງ
ແຕ່ລະຄົນ ແຕ່ລະຄອບຄົວນໍ? ບາງຄອບຄົວມັກໃຫ້ລູກນຸ່ງເຄື່ອງຈົບງາມແບບສຸພາບອ່ອນໂຍນແດ່? ບາງຄອບຄົວກໍຢາກ
ໃຫ້ທັນຍຸກທັນສະໄໝ ເອົາແບບນາງເອກໃນລະຄອນໂທລະພາບກໍຫາກມີ ແລ້ວແຕ່ນໍ?.
               ອັນສຳຄັນເລື່ອງການນຸ່ງຖືນີ້ ຢາກໃຫ້ເບິ່ງກາລະ-ເທສະ ແລະ ສະຖານທີ່ສຳຄັນ ບໍ່ແມ່ນວ່າໝົດພິທີນັ້ນ ງານ
ນັ້ນ ບຸນນັ້ນ ໃຜກໍແນມເບິ່ງ ຫຼື ຈ້ອງສາຍຕາເບິ່ງແຕ່ໂຕເອງ ມັນກໍບໍ່ຄັກ? ເບິ່ງແບບດີກໍບໍ່ວ່າ... ແຕ່ເບິ່ງແບບອື່ນ ຫຼືວ່າປະ
ເຈີດປະເຈີ້ເກີນໄປ ມັນກໍບໍ່ຄັກປານໃດ?.
               ທາງອອກຂອງເລື່ອງນີ້ ຄົງແມ່ນສະຖາບັນຄອບຄົວເປັນຫຼັກ ຈະໃຫ້ການຈັດຕັ້ງອອກມາວາງລະບຽບກໍບໍ່ໄດ້...
ຕ້ອງເບິ່ງວ່າ ມາດຖານສັງຄົມເປັນແບບໃດ? ຮັບໄດ້ຊ່ຳໃດ ຈາກຄອບຄົວແລ້ວ ຈຶ່ງມາເຖິງຕົນບຸກຄົນເອງວ່າຈະວາງທ່າ
ທາງການນຸ່ງຖືແນວໃດຈຶ່ງຈະເໝາະສົມ ໃນເວລາໄປຮ່ວມພິທີ ຮ່ວມບຸນສິນກິນທານຕ່າງໆ ອັນນີ້ເຂົາເອີ້ນວ່າ ຄວາມຮູ້
ຮອບຕົວ ໃຜສອນໃຜບໍ່ໄດ້ ຕ້ອງຊອກຮູ້ຮ່ຳຮຽນດ້ວຍຕົນເອງ... ເພື່ອເພີ່ມຄວາມສະຫງ່າງາມໃຫ້ແກ່ຕົນເອງ ເວລາໄປຮ່ວມ
ພິທີ ຫຼືງານບຸນສິນກິນທານຕ່າງໆ... ເຖົ້າແກ່ບູຮານເພິ່ນວ່າ: ໄກ່ງາມຍ້ອນຂົນ ຄົນງາມຍ້ອນແຕ່ງ ແຕ່ຈະແຕ່ງຢ່າງໃດ
ໃຫ້ມັນພໍດີພໍງາມ ຍັງແມ່ນຂຶ້ນກັບໃຈມັກຂອງແຕ່ລະຄົນນໍ?.

Source:
ນ.ສ.ພ ວຽງຈັນໃຫມ່
ນານາສາລະ
21-10-2008, 10:08:54