LSAJ

               ເຫດການສະຫຍອງຂວັນລາຍນີ້ເກີດຂຶ້ນຢູ່ບ້ານຫລັງຄັງ ເມືອງບົວລະພາ ແຂວງຄຳມ່ວນ ຕາມການເປີດເຜີຍ
ຂອງທ່ານ ຮ.ອ ໂອລິບ ຫົວຫນ້າກອງຕຳຫລວດສອບສວນອາຍາ ປກສ ແຂວງຄຳມ່ວນ ໃຫ້ຮູ້ວ່າ: ຜູ້ຕ້ອງຫາໃຈໂຫດລາຍນີ້
ຊື່ວ່າ ທ້າວ ສົມນຶກ ອາຍຸ 18 ປີ ແລະ ທ້າວ ລຳພັນ (ນ້ອຍ) ອາຍຸ 17 ປີ ທັງສອງເປັນປະຊາຊົນບ້ານຫລັງຄັງ ເມືອງ
ບົວລະພາ ຖືກເຈົ້າຫນ້າທີ່ກັກຕົວໃນວັນທີ 5/6/08 ໃນຂໍ້ຫາຄາດຕະກຳຊີງຊັບ.
               ໃນວັນທີ 15/5/2008 ເວລາປະມານ 10 ໂມງ ທ້າວ ສົມນຶກ ແລະ ທ້າວ ລຳພັນ ໄດ້ພາກັນກິນເຫລົ້າຂາວຢູ່
ເຮືອນທ້າວ ສົມນຶກ ຫມົດເຫລົ້າຂາວ 2 ແກ້ວແປັບຊີ ແລ້ວທ້າວ ລຳພັນ ໄດ້ຊວນທ້າວ ສົມນຶກ ໄປເອົາເສື້ອທີ່ຜູ້ກ່ຽວລືມໄວ້
ຢູ່ເຮືອນດອງ ບ້ານແສນພັນ ເມືອງບົວລະພາ ມາຮອດເວລາ 12 ໂມງຂອງວັນດຽວກັນ ພວກກ່ຽວທັງສອງກໍໄດ້ພາກັນຂີ່
ລົດໄຖນາໄປ ເຊິ່ງເປັນລົດຂອງທ້າວ ລຳພັນ ພໍໄປຮອດເຮືອນດອງດັ່ງກ່າວ ບໍ່ເຫັນເສື້ອ ຈາກນັ້ນຜູ້ກ່ຽວທັງສອງຈຶ່ງໄດ້ພາ
ກັນຂີ່ລົດໄຖນາກັບຄືນບ້ານຫລັງຄັງ ເຊິ່ງທ້າວ ລຳພັນ ເປັນຜູ້ຂັບ ພໍມາຮອດລະຫວ່າງທາງບ້ານຫລັງຄັງ ຫ່າງຈາກບ້ານ
ວັງຄົນ ປະມານ 1 ກິໂລແມັດ ເຊິ່ງເປັນເສັ້ນທາງປ່ຽວ ບໍ່ມີບ້ານຄົນ ພວກກ່ຽວພົບເຫັນທ້າວ ວູຊວານ ຫ້ຽນ (ຄົນຫວຽດ
ນາມ) ຄົນດຽວ ກຳລັງແປງໂສ້ລົດຈັກດຼີມຢູ່ຄົນດຽວ ຈາກນັ້ນທ້າວ ສົມນຶກ ຈຶ່ງໄດ້ຊັກຊວນທ້າວ ລຳພັນ ຕີເອົາເງິນ ທ້າວ
ລຳພັນ ໄດ້ຈອດລົດໄຖນາຢູ່ຄົນລະຟາກທາງຫ່າງຈາກລົດຈັກຂອງທ້າວ ວູຊວານຫ້ຽນ ປະມານ 3 ແມັດ ພາຍຫລັງຈອດ
ລົດໄຖນາແລ້ວ ທ້າວ ສົມນຶກ ກໍໄດ້ຈັບໄມ້ຄ້ອນຢູ່ໃນລົດໄຖນາ (ເຊິ່ງເປັນໄມ້ຄ້ຳລົດໄຖ) ຍາວ 1 ແມັດ ລົງໄປຕີໃສ່ງ່ອນຂອງ
ທ້າວ ວູຊວານຫ້ຽນ 1 ບາດລົ້ມລົງ ຈາກນັ້ນທ້າວ ລຳພັນ ຈິ່ງໄດ້ແລ່ນໄປໄຂເອົາຄ້ອນຕີຢູ່ເບາະລົດໄຖນາອອກມາຕີໃສ່ຂະ
ຫມັບຫູຕື່ມບາດຫນຶ່ງ ແລ້ວຜູ້ກ່ຽວຈິ່ງຂາດໃຈຕາຍຄາທີ່ ຈາກນັ້ນທ້າວ ສົມນຶກ ກໍໄດ້ກວດເອົາເງິນຢູ່ກະເປົາທີ່ທ້າວ ວູ
ຊວານຫ້ຽນ ພາຍຢູ່ນັ້ນ ຫລັງຈາກຄົ້ນເອົາເງິນຫມົດແລ້ວ ຜູ້ກ່ຽວທັງສອງຄົນກໍໄດ້ພາກັນລາກແກ່ສົບລົງໄປຂອບທາງແດງ
ຫ່າງຈາກສະຖານທີ່ເກີດເຫດ 9 ແມັດ ແລ້ວພວກກ່ຽວທັງສອງກໍໄດ້ພາກັນຕິດຈັກລົດໄຖນາຂີ່ມຸ່ງຫນ້າໄປບ້ານຫລັງຄັງ
ພໍຂີ່ໄປກາຍແຄ້ມແມັກ (ຂອງອົງການເກັບກູ້ລະເບີດ) ປະມານ 50 ແມັດ ນ້ຳມັນລົດໄຖນາຫມົດ ພວກກ່ຽວຈິ່ງຈອດປະໄວ້
ແລະ ພາກັນຍ່າງເມືອບ້ານຫລັງຄັງ ພໍຮອດບ້ານທ້າວ ສົມນຶກ ກໍໄດ້ເອົາເງິນໃຫ້ທ້າວ ລຳພັນ ຈຳນວນ 20.000 ກີບໄປຊື້
ນ້ຳມັນໄປໃສ່ລົດໄຖ ແລ້ວໃຫ້ຂີ່ມາປະໄວ້ຢູ່ເຮືອນຄືເກົ່າ ຫລັງຈາກນັ້ນ ທ້າວ ສົມນຶກ ແລະ ທ້າວ ລຳພັນ ກໍພາກັນໄປແບ່ງ
ປັນເງິນຢູ່ປ່າຂ້າງບ້ານ ໄດ້ຄົນລະ 600.000 ກີບ (ຫົກແສນກີບ) ພາຍຫລັງແບ່ງເງິນແລ້ວກໍໄດ້ພາກັນເອົາຕົວຫລົບຫນີໄປ
ລີ້ຊ່ອນຢູ່ແຂວງຈຳປາສັກ.
               ເຖິງຈະໄປລີ້ຊ່ອນຢູ່ໃສກໍຕາມ ແຕ່ກໍຫນີບໍ່ພົ້ນການຕິດຕາມຂອງເຈົ້າຫນ້າທີ່ ພວກກ່ຽວຖືກຈັບຕົວມາດຳເນີນ
ຄະດີໃນວັນທີ 5/6/08 ຜ່ານການສອບສວນ ພວກກ່ຽວຍອມຮັບສາລະພາບວ່າ ເຈດຕະນາຄາດຕະກຳຊີງຊັບຢ່າງແທ້ຈິງ
ໂດຍບໍ່ໄດ້ມີຄວາມຄຽດແຄ້ນແຕ່ຢ່າງໃດ.

-------------------------------------------------------------------------

http://www.vientianemai.net/news.php?TopicID=17&NewsID=3785